პატარა, ბანალური პოსტი ძაღლებზე

ვიდეო მოლაპარაკე ძაღლზე მაკა ასათიანმა დაპოსტა ფეისბუქზე. სახალისოა, მაგრამ მე ეს ვიფიქრე, რატომაა რომ ჩვენ, ადამიანებს გვსურს, ირგვლივ ყველა ჩვენ გვგავდეს?

მშობლებს სურთ, შვილები მათი ალი-კვალნი იყვნენ. მეგობრებს სურთ, მათ მეგობრებს მათნაირად ეცვათ, მათნაირი გემოვნება ქონდეთ. პატრონებს სურთ, ძაღლები მათ ენაზე საუბრობდნენ?

WTF?!

* პომპეის გათხრებისას, ამოფრქვეული ვეზუვის ფერფლქვეშ იპოვნეს ბავშვისა და ძაღლის ჩონჩხი, ძაღლი ბავშვს იყო გადაფარებული – როგორც ჩანს, ცდილობდა ლავისგან მის დაფარვას.

* მე-13 საუკუნეში მწევარი სენ-გინეფორტი შხამიან გველსა და პატრონს შორის ჩადგა. გველმა ის დაგესლა და ძაღლი გარდაიცვალა. პატრონმა მას საფლავი გაუკეთა და ლეგენდის მიხედვით ამ ადგილას დავრდომილი ადამიანები იკურნებოდნენ.

* სენბერნარმა ბარიმ მე-19 საუკუნის დასაწყისში ალპების ზვავში მოყოლილი 40-ზე მეტი ადამიანი იხნა, ერთ-ერთი იყო ბავშვი, რომელიც თოვლქვეშ გაყინულიყო და ყველას მკვდარი ეგონა, ბარის გარდა. ის მანამდე ლოკავდა და ცდილობდა საკუთარი სხეულით გაეთბო, სანამ არ მოასულიერა და გადაარჩინა.

* ციმბირულმა ჰასკიმ (იმის მსგავსმა, ვიდეოზე რომააა), სახელად ბოლთომ, მე-20 საუკუნის დასაწყისში 1’600 კილომეტრი დაფარა, რათა ალაიასქის შორეულ ქალაქში ჩაეტანა ანტი-დიფტერიული ვაქცინა (თვითმფრინავით ამის გაკეთება შეუძლებელი იყო, ვინაიდან 40 გრადუსიანი ყინვის გამო ავია-ძრავი გაყინულიყო და ვერ აფრინდა).

* შარშან ერთ ახალზელანდიელ ბიჭუნას ორი ცოფიანი პიტ-ბული დაესხა თავს და მას ჯექ-რასელ ტერიერი სახელად ჯორჯი გამოექომაგა (ფილმ “ნიღაბში” ძაღლი რომ თამაშობს, ის ჯიშია. ახლა კი  წარმოიდგინეთ ორი პიტ-ბული…). ჯორჯმა თავისი პატრონი იხსნა, თუმცა თავად ის პიტ-ბულებმა დაგლიჯეს.

* არაერთი შემთხვევაა ცნობილი, როდესაც ძაღლები გარდაცვლ პატრონებს წლების განმავლობაში ელოდებოდნენ. ეს იყო აკიტა ინოს ჯიშის ჰატიკო, ნაგაზი შეფი, სქაი-ტერიერი ბობი და მრავალი სხვა…

ძაღლებმა ჩვენებურად ლაპარაკი არ იციან, მაგრამ მათ იციან ბევრად უფრო მნიშვნელოვანი რამ – უანგარო მეგობრობა და უსაზღვრო ერთგულება. ბანალური ვიქნები, მაგრამ მაინც დავწერ – ისეთი ერთგულება, ჩვენ, ადამიანებმა (ხშირად) რომ არ ვიცით.
© Lord Vader. Stylish Blog. საავტორო უფლებები დაცულია. ნამუშევრის კოპირება, ციტირება და გამოქვეყნება დაშვებულია მხოლოდ ავტორისა და წყაროს (პოსტზე ლინკის) მითითებითა და ნებართვით. This work is licensed under a Creative Commons Attribution-NonCommercial 3.0 Unported License.

___