საშობაო საჩუქარი Amazon.com-ისგან: ახალი სერვისი

Amazon.com თავის კლიენტებს სთავაზობს ახალ სერვისს Amazon PayPhrase (“ამაზონის გადახდის ფრაზა”), რომელიც ონლაინ-შოფინგსა და ინტერნეტ-მაღაზიებში ფულის ფლანგვას ნამდვილ სიამოვნებად აქცევს. 🙂

მისი გამოყენებისთვის “ამაზონ.კომ”-ის კლიენტმა უნდა მოიფიქროს რაიმე ფრაზა (ვთქვათ, “I am the best buyr in the world”) და 4-ციფრიანი PIN-ი და შეიყვანოს ისინი Amazon.PayPhrase ინტენრნეტ-გვერდზე სპეციალურ ფანჯარაში და დაამახსოვრებინოს – აქედან მოყოლებული თქვენს მიერ მოფიქრებული ფრაზა თქვენს ინდივიდუალურ გასაღებად იქცევა, რომელიც მრავალი ვებ-მაღაზიის (DKNY, J&R Electronics, Car Toys, Buy.com… და სხვა) კარს შეაღებს.

თუკი, ამ ვებ-მაღაზიებში რამის შეძენა გსურთ, იქ თქვენი საკრედიტო ბარათის ნომრისა და მისამართის შეყვანა საჭირო აღარაა  – საკმარისია ის PayPhrase აკრიფოთ, რომელიც მანამდე “ამაზონ”-ს გაანდეთ, დანარჩენს – “ამაზონი” მიხედავს. როგორც თავად “ამაზონი” ადასტურებს, მოლაპარაკებები მიმდინარეობს პრაქტიკულად ყველა წამყვან ინტერნეტ-მაღაზიასთან, რათა ისინიც შეუერთდნენ Amazon PayPhrase-ის საპარტნიორო სისტემას.

Amazon PayPhrase, გარკვეულად, მსგავსია Google Checkout და PayPal-ის სისტემებისა, მაგრამ, PayPal საქართველოსთან არ მეგობრობს, Google Checkout-ს კი არ ყავს სიაში ისეთი კარგი მაღაზიები როგორც Amazon PayPhrase-ს (თუნდაც DKNY რად ღირს!).

“ჩვენი კლიენტები უეჭველად დააფსასებენ PayPhrase-ის სერვისის სიიოლეს და მოხერხებულობას,” – განუცხადა New York Times-ს Amazon PayPhrase-ის გადახდების გენერალურმა მენეჯერმა მეთ უილიამსმა, – “სხვადასხვა ვებ-მაღაზიაში შოფინგისთვის მათ არ მოუწევთ ამ საიტებისთვის თავიანთი საკრედიტო ბარათის ნომრის, საცხოვრებელი მისამართის თუ სხვა სახის ინფორმაციის გაზიარება. მეტიც, რეგისტრაციაც კი არ დასჭირდებათ. აუთენთიფიკაციის პროცესს მხოლოდ Amazon PayPhrase-ის საშუალებით განახორციელებენ.”

ამასთან, Amazon PayPhrase-ის საშუალებით ნებისმიერ პარტნიორ ვებ-მაღაზიაში განახორციელებულ ყველა შენაძენზე ინფორმაცია თქვენს Amazon.com-ის კალათაში მოიყრის თავს – ამდენად, მათთვის თვალის მიდევნება ბევრად იოლი გახდება.

და კიდევ ერთი საინტერესო ფუნქცია – “ამაზონის” კლიენტს რამდენიმე (უფრო ზუსტად – 20) “გადახდის ფრაზა” შეუძლია ჰქონდეს ერთ ანგარიშზე მიბმული, მათზე ინდივიდუალურად დააწესებული სხვადასხვა თანხის ლიმიტით.

რისთვის არის ეს საჭირო?

ძალიან მარტივია – ვთქვათ, თქვენმა გერლ-ფრენდმა, ცოლმა, შვილმა, სიდედრმა და ვინც გნებავთ კიდევ იმან თავისი მთელი თვის ხელფასი გაფლანგა და ახლა თქვენს იმედზეა – შექმენით მისთვის ცალკე “ფრაზა”, დაუწესეთ თანხის ლიმიტი და  აჩუქეთ საშობაოდ.

Amazon PayPhrase-ის მეშვეობით გნხორციელებული ნებისმიერი ტრანზაქცია “ამაზონ”-ის სტანდარტული საგარანტიო პროგრამითაა დაცული (Amazon.com A-to-z Guarantee) – ზოგჯერ ხდება, რომ ამა თუ იმ მაღაზიაში შეძენილი საქონელი არ იგზავნება, ან იგზავნება დაგვიანებით (რაც, რა თქმა უნდა, ცუდი ორგანიზების ბრალია). სამწუხაროდ, ცნობილი უნივერსამებიც კი სცოდავენ – მაგალითად, Macy’s. ბუნებრივია, თანხას ამ დროს არ კარგავთ, თუმცა, ეს ყველაფერი მაინც უსიამოვნოა. Amazon.com A-to-z Guarantee ასეთ რამეს გამორიცხავს. ამის გამოცაა სწორედ, რომ “ამაზონ”-ის მიმართ კლიენტთა კეთილგანწყობა ACSI-ს 100-ქულიან შკალაზე 84 ქულით ფასდება, რაც მეორე პოზიციაა და მხოლოდ ერთი ქულით ჩამორჩება პირველ ადგილზე მყოფ ვიდეო-ფილმების გაქირავების სერვისს Netflix.com-ს.

© Lord Vader. Stylish Blog.
საავტორო უფლებები დაცულია. ნამუშევრის კოპირება, ციტირება და გამოქვეყნება დაშვებულია მხოლოდ ავტორისა და წყაროს (პოსტზე ლინკის) მითითებითა და ნებართვით და მხოლოდ არაკომერციული მიზნებით. This work is licensed under a Creative Commons Attribution-NonCommercial 3.0 Unported License.

___
ასევე:
Amazon.com – იქ, სადაც ელექტრონული კომერცია იწყება

სამი რჩევა ონლაინ შოფინგისთვის