“2001 წლის კოსმიური ოდისეა” (2001: A Space Odyssey) თუ ნანახი გაქვთ, სავარძლები გემახსოვრებათ. თუ არ გახსოვთ, ძალიანაც ნუ დაგწყდებათ გული – სავარძლები ამ კინოსაგაში მთავარი არ არის… მაგრამ მნიშვნელოვანი შტრიხი კია. აგერ, ის სავარძლები.
სთენლი ქუბრიქმა რამდენიმე დიზაინერს სთხოვა ფილმისთვის კოსმოსური Hilton-ის სასტუმროს უნიკალური ინტერიერის შექმნა . მათ შორის ყველაზე დასამახსოვრებელი კვალი ოლივიე მუღგმა დატოვა.
ოლივიე მუღგი (Olivier Mourgue) 60-იანების იმ დიზაინერთა შორისაა, ვინც ახალი ფორმების, იდეების, ტექნოლოგიებისა და მასალების ძიებაში იყო. ამ დიზაინერებს ჰქონდათ შემოქმედებითი წვის ფუფუნება, ისე, რომ დაფინანსება არ ეძებნათ. თანხებზე Mobilier National ზრუნავდა (ამაზე უკვე ვწერდი ადრეულ პოსტში), თუმცა მუღგს არც კომერციული წარმატება აკლდა. მისი ავეჯი ბევრი დიდი კომპანიის კაბინეტებში იდგა, როგორც საფრანგეთში, ისე – მის გარეთ. თანამშრომლობდა შვედურ მაღაზიათა ქსელ Nordiska Kompaniet-თან, ფრანგულ Agence d’Architecture Interieure Gautier-Delaye-თან, მაგრამ ყველაზე წარმატებული ფრანგულ ავეჯის მწარმოებელ Airborne International-თან თანამშრომლობა იყო, სადაც მისი ფუტურისტული იდეების ნაწილის განსხეულება მოხერხდა. დიდი წილი მხოლოდ სამუზეუმო ექსპონატებად დარჩა.
მუღგი დიზაინისა და არქიტექტურის L’École Boulle-სა და გამოყენებითი ხელოვნების ეროვნული სასწავლებლის, ÉnsAD Paris-ის კურსდამთავრებულია (ისე, როგორც ეტიენ ფერმიჟიე). ჰქონდა საკუთარი შემოქმედებითი სტუდია-ლაბორატორიაც.
“ჯინის” სერიას, ოლივიე მუღგის შემოქმედებით მწვერვალად იტყვიან ხოლმე. ალბათ, ასეც არის, თუმცა დიზაინერს ბევრი სხვა საოცარი პროექტიც აქვს განხორციელებული. ჯინი, გაგონილი გექნებათ, აღმოსავლური მაქციაა, ვისაც, ლეგენდით, ნებისმიერი სულიერის სხეულის ფორმის მიღება შეუძლია. ისე, როგორც მუღგის Djinn სავარძლებსა და სოფას.
არ ვიცი, ეგებ ქუბრიქის საპატივცემულოდაც იყო, მაგრამ 1968 წლის ავეჯის სერიას “კუბიკი” (Cubique) დაარქვა. კუბიკის სკამის დიზაინმა პრესტიჟული ჯილდო AID International Design Award მოიპოვა.
ზემოთ დავწერე, სხვადასხვა დიდი კომპანიების ოფისების ინტერიერის მოწყობაზე მუშაობდა, მათ შორის იყო Bayer-ის ხომალდი Visiona. ეს გერმანული ქიმიურ-ფარმაცევტული გიგანტის საიმიჯო პროექტი იყო, 5 წლის განმავლობაში ხომალდის ინტერიერის მოსაწყობად ყველაზე გამოჩენილ, დღეს რომ ვიტყვით ხოლმე, “ცნობად” დიზაინერს იწვევდნენ: გენიოსი დანიელი ვერნერ პანტონი, იტალიელი ჯო კოლომბო, ჯექ ლენორ ლარსენი… 71-ში ხომალდის ინტერიერი ოლივიე მუღგს ანდეს.
2014 წელს Vitra Design Museum-ში Visiona-ს ექსპოზიცია მოეწყო, სადაც ხომალდის კაიუტების რეკონსტრუქცია მოახდინეს.
კოსმიური ოდისეა ერთადერთი ფილმი არაა, სადაც მუღგის ავიჯი მონაწილეობს. მისეული ტყავის Chaise longue-ზე თვით მისი უდიდებულესობის აგენტი ჩამომჯდარა (68 წლის ბონდიანა “მხოლოდ ორჯერ ცხოვრობ”).
კოსმიური ოდისეის ორიგინალი სავარძლები აღარ არსებობს. გადაღების დასრულების შემდეგ ქუბრიქმა გაანადგურა, რატომ კარგი აგიგიაო. არ სურდა, რომ კიდევ ვინმე სხვა რეჟისორს გამოეყენებინა.
დარჩა ასე ექსკლუზივად.
თუმცა, ისინი აღადგინეს ფილმის 50 წლის იუბილის აღსანიშნად და ლონდონის დიზაინის მუზეუმსა და ფრანკფურტის კინოს მუზეუმში გამოფინეს.
© Lord Vader. Stylish Blog. საავტორო უფლებები დაცულია. ნამუშევრის კოპირება, ციტირება და გამოქვეყნება დაშვებულია მხოლოდ ავტორისა და წყაროს (პოსტზე ლინკის) მითითებითა და ნებართვით. This work is licensed under a Creative Commons Attribution-NonCommercial 4.0 Unported License.
___